Aropurahéita mombyry guive
Che valle porã ahejava'ekue
Oiméva opyta kurahy resêre
Caballero Pueblo, upéva ha'e
Ag̃uiete chugui ku Zorrilla Kue
Horqueta, Lindero, yvoty renda
Ha Emiliano R. Fernández
Guavira poty mandu'aiteha

Yvoty meméko upe nde jerére
Nembojeguapa, nde, che vallemi
Oime Campichuelo ha Pirayuvy
Hovái opyta Cerro Ybytymi
Javy'ahaite tamombe'umi
Oiméva Potrero Naranjaty
Upépe heta oime iporãva
Kuña ijukýva, resa yvoty

Jahávo ñaína ka'aguy pa'ûre
Ñanembovy'áva umi guyra ñe'ê
Arroyo porã hesãka asýva
Osyry mbeguéva, mborayhu meme
Upéiko ñasêma upe Franco Ñúre
Yvága rokê ha'ete voi
Ijykerete oime Cerro Ñu
Ha ojekuaáma avei Franco'i

Ku Ceibo syry oiméne akóinte
Iporã hekópe, kunu'û meme
Yma che mitãme ahamihague
Hondita che kuãre asajepyte
Vy'a sarakípe upérupi aikómi
Yvytu pepóre che akãhatã
Che vy'ahague yma che mitã'ípe
Péicha mandu'a ko'ãga aheja

Upéi jahasávo oime Isla Segura
Valle'i Corá javy'ahaite
Oime Catalán, Teniente Martínez
Ruta Pa'i Vega puéblope oguahê
Ya pehendupáma, mayma los amigos
Caballero Puéblope ascribiva'ekue
Ha vokóinte upepé jajotopapáne
Ku San Luis ára oguahêvove