Péina ahekýi che apytu'ûkuágui
Che ñe'ê pyahu poravopyre
Ha ijapapamíva topu'ã hupágui
Tohendu ha'éva Residenta Kue

Mbohapy tetã ñande aho'ipárõ
Umi charruá ha umi querandí
Upérõje López ndohechaséi ho'árõ
Kamba pópekuera Kuña Guarani

Ha omomarandu maymáva kuñáme
Ñane Mariscal iñe'ê omyasãi
Ndoipotáigui oho pytagua retãme
Oikove asy Kuña Paraguái

Mariscal ñe'ê ojapo potávo
Maymáva kuña ha mitãmimi
Osêmba oje'ói hekorã rekávo
Hi'ãguivo oúvo umi kamba'i

Oiméanga opytáva upe itaperépe
Hymba jaguami oguahu asy
Ha ijarakuéra ojeity tapépe
Hekohaguemi omotyre'ỹ

Ha hi'orokuéra oñotỹmbaségui
Ohejava'ekue hogakuerami
Ndaha'eiva'ekue aipo kyhyjégui
Kamba apatîgui Kuña Guarani

Ha upéi ipahápe, kuimba'e opávo
Oipe'a isáikuera ha omonde kasõ
Hetã rayhupápe oiko ohechaukávo
Kuña Guarani korasõ ñarõ

Nde'ireirichéne he'írõ hikuái
Ñande sy yma Residenta Kue
Mbohapy tetã kuimba'e rovái
Oréko mboka rombopuva'ekue