Kel kasinha na kel ladera
na mei di sol y d'ventaina
era un palos de pedra y kal
construido na mei di luta

N ta lembrá surisu de nha pai
enbora kansod
Se alegria d'oia nos flisidad
Desabrotxa

Kel kasinha na kel ladera
era un mundo maravilhos
Inda N ta lembra nos brinkadera
Nos ilusao nos sonh kalod
Y na kansao de nos desejos
Esperansa no tinha de konxe mundo

Pa disfruta se dose y se margos
Tud se rikesa
Y volta un dia pa simplisidadi
di nos kasinha

Kel txalutera na se kintal
era un floresta pa aventura
Na sinema d'nos fantasias
nos era spot kontra bandid

Na ora minguod no tava dskansa
La na sombra de se impena
No tava uví jent grand ta konversa
ta ralembrá
ta partilha tud ses recordasao
ses mosidad

Nha kasinha, aoje ta-m ben lonje
Li na sidad d'aranhaseu
Vida levo-m pa ot ladera
Mas agrest sem mut dusura

Kel txalutera aoje ja vrá lenha
Tud já mudá, fká so lembransa
Na mei dum mar d'fmasa y kasarona
Nha kasinha N perdé

Nakel ladera surgí un nov sidad
y onde nha kasinha

Oh nha kasinha
onde bo ta
Pa nha kasinha, Ja-N kre voltá
Onde é nha kasinha
onde bo ta